శాంతి సౌక్యముల సమత పండగ

శాంతి సౌక్యముల సమత పండగ
                                                              -పిఎన్ మూర్తి (9441151762)

గుండెల రేగడిపై గులాభిమొలిచింది
త్యాగపు నెత్తుటిలో జెండా వెలిసింది
విప్లవపుంతల్లో ధగధగ మెరిసింది
చీకటి బతుకులలో వెలుగులుచిమ్మింది

చక్రవర్తులను మట్టు బెట్టినది
నాజి మూకను తరిమి గొట్టినది
పాపపు పాలన పాతి పూడ్చినది
సామ్యవాదమె చాటి చెప్పినది  -
 శాంతి దీపమై వెలుగు నిచ్చినది   -గుండెల రేగడిపై గులాభి మొలిచింది

రజాకార్లకు ఎదురు నిలిచినది
వెట్టిచాకిరి ఎగర కొట్టినది
గడీల దొరలకు గబులు రేపినది
దున్నెవానికే భూమి పంచినది
బాంచనన్నలకు అండనిలిచినది
-గుండెల రేగడిపై గులాభి మొలిచింది
వలస వాదమును కుళ్ళబొడిచినది
పరపీడనను పాతరేసినది
పరాయిపాలన గొంతునొక్కినది
సమర వీరుల శంఖమైనది -
 ఉద్యమాలకే శ్వాసనిచ్చినది
-గుండెల రేగడిపై గులాభి మొలిచింది
అవినీతి రాజ్యమె కూల్చివేయగా
కష్టజీవుల సైన్యమెకదలగ
కార్మిక కర్షక ఐక్యత నిండగ
తల్లి భారతి సంతసించగ
నెరిపె పోరులొ ఎరుపే మెరుపై
శాంతి సౌక్యముల సమత పండగ
-గుండెల రేగడిపై గులాభి మొలిచింది

ఉద్యమ జెండా ఎత్తర అన్న
-                                                                                       పి ఎన్ మూర్తి (9441151762)

ఆత్మగౌరవం పాలనలొ - ఆత్మహత్యలు ఏందన్న
గద్దెల పైన మనవాడున్న - బాధల దరువు ఏందన్న
యమ బాధల దరువు ఏందన్న

ఉత్తర దిక్కున గోదారమ్మర - పశ్చిమకనుముల కిష్ణానదిరా
పారే నదులు పక్కనవున్నా - గుక్కెడు దాహం తీరకపోయె
ఏలే రాజులు మారినగాని
నీటి ఎద్దడె మారకపోయె ''ఆత్మగౌరవం పాలనలొ''

పూటకు గంట కరెంటివ్వరు - మోటరు బోరు నడవకపోయె
పుట్టెడు వడ్లు పండిన పొలమున - పట్టెడు వడ్లు పండకపోయె
మారిరి ఒక్కరె పాలకులన్న
కరెంటు కోతలు తప్పకపోయె                                                  ''ఆత్మగౌరవం పాలనలొ''

దగా కోరుల వంచెనరయ్యో - ఎరువుల కొరత కల్తీ విత్తులు
దళారి కొడుకుల దోపిడి దాహం - రైతుల బతుకుల వీడని శాపం
ఉద్యమ పార్టీ గద్దెను ఎక్కిన
వెనకటి పాలన మారకపోయె   ''ఆత్మగౌరవం పాలనలొ''

చేసిన బాసల ఊసే లేదు - అప్పుల భారం తప్పకపోయె
రుణ మాఫీల జాప్యం చూడు - వెతలే తీరని మనుగడపోరు
నీళ్ళు నిధులు రాబట్టుటకై
నియామకాలు చేపట్టుటకై
ఆత్మగౌరవం నిలబెట్టుటకై
ఉద్యమజెండా ఎత్తర అన్న