బతుకమ్మ తోట

 పిఎన్ మూర్తి

9441151762

mial: pnmoor@gmail.com

స్ర్తీ పురుష బేధాలు మాకుండవంటూ

బతుకమ్మ తోటలో తంగేడుపూలతో

చిలుకమ్మ చెప్పింది....-మురిపంగ పలికింది..... ఓ పాల పిట్టా - ఓజమ్మి చెట్టా

జాతి రంగుల తేడ మాకుండదంటూ

బతుకమ్మ తోటలో మందార పూలతో

కోకిలా కూసింది...గొంతెత్తి పాడింది... ఓ పాల పిట్టా - ఓజమ్మి చెట్టా

కలసి నడిచే నడత మాకున్న దంటూ

బతుకమ్మ తోటలో చేమంతి పూలతో

కుందేలు చెప్పింది మనసిప్పి నవ్వింది... ఓ పాల పిట్టా - ఓజమ్మి చెట్టా

తరతమా భేదాలు తనకసలు లేదంటు

బతుకమ్మ తోటలో పూబంతి పూలతో

చిరుగాలి చెప్పింది హాయిగా వీచింది.... ఓ పాల పిట్టా - ఓజమ్మి చెట్టా

జగమంత తానై వెలుగిస్తనంటు

బతుకమ్మ తోటలో గునగమ్మ పూలతో

వెలుగమ్మ చెప్పింది ఎలుగెత్తి చాటింది... ఓ పాల పిట్టా - ఓజమ్మి చెట్టా

తాగేటి నీటికి అంటుండదంటూ

బతుకమ్మ తోటలో గుమ్మడీ పూలతో

వాగమ్మడే చెప్పి గలగలా పారింది. ఓ పాల పిట్టా - ఓజమ్మి చెట్టా

విత్తేది ఏదైనా - మొలిపిస్తనంటు

బతుకమ్మ తోటలో -బీరమ్మ పూలతో

నేలమ్మ నుడివింది -గర్వంగ పలికింది... ఓ పాల పిట్టా - ఓజమ్మి చెట్టా

చదివేటి నా చిన్ని చదువు ఆపాకమ్మా....

పుట్టినా చిన్నారి ప్రాణాలు నిలబెట్టరమ్మా.....

బ్రతుకిచ్చి బ్రతికించు మనుసున్న మనిషి ఓ పాల పిట్టా - ఓజమ్మి చెట్టా